AÞ Þrif hafnaði í 1. sæti á lista Great Place to Work yfir frábæra vinnustaði á Íslandi og er viðurkenningin skýr staðfesting á þeirri sterku vinnustaðamenningu sem byggð hefur verið upp innan fyrirtækisins. Þar eru samheldni, teymisvinna, gagnkvæmur stuðningur og virðing í forgrunni.
Árangurinn er ekki aðeins mikil viðurkenning fyrir AÞ Þrif, heldur einnig mikilvægt tækifæri til að varpa jákvæðu ljósi á ræstingarstarfið og það faglega starf sem fer fram víðs vegar um landið. Í viðtalinu ræðir Dagbjört Una Helgadóttir, sviðsstjóri mannauðs hjá AÞ Þrif, um menninguna, mikilvægi GPTW-vottunarinnar og hvernig fyrirtækið notar niðurstöður kannana til að styrkja starfsumhverfið enn frekar.
1. Nefndu eitthvað sem öðru fremur einkennir vinnustaðamenninguna í þínu fyrirtæki?
Vinnustaðamenning okkar einkennist fyrst og fremst af sterkri samheldni og teymisvinnu. Við leggjum áherslu á að starfsfólk upplifi sig sem hluta af samstilltu teymi þar sem gagnkvæmur stuðningur og virðing eru í fyrirrúmi. Þetta endurspeglast meðal annars í öflugri nýliðafræðslu, góðum fríðindum og virku starfsmannafélagi. Fræðsla og þróun starfsfólks er jafnframt lykilþáttur í starfsemi okkar og höfum við meðal annars hlotið tilnefningu sem menntafyrirtæki ársins.
2. Hvaða þýðingu hefur það fyrir ykkur að vera í 1. sæti á lista GPTW yfir Bestu vinnustaðina?
Að vera í 1. sæti á lista GPTW yfir bestu vinnustaðina er mikil viðurkenning og staðfesting á árangri í uppbyggingu jákvæðrar vinnustaðamenningar. Þetta er jafnframt mikilvægt tækifæri til að varpa jákvæðu ljósi á ræstingarstarfið. Árangurinn undirstrikar að starfsfólk okkar upplifir vellíðan og ánægju í starfi, á fjölbreyttum vinnustöðum víðs vegar um landið.
3. Telur þú vottun GPTW hjálpa til við að laða hæfileikaríkt starfsfólk að fyrirtækinu?
Vottun GPTW hefur án efa jákvæð áhrif á aðdráttarafl fyrirtækisins. Hún styrkir ímynd okkar og eykur sýnileika á vinnumarkaði, sem gerir okkur betur í stakk búin til að laða að og halda í hæfileikaríkt starfsfólk.
4. Hafa kannanir GPTW leitt af sér breytingar á nálgun og áherslum í mannauðsmálum?
Niðurstöður GPTW-kannana eru mikilvægur grunnur að stefnumótun í mannauðsmálum. Árleg könnun veitir dýrmæta innsýn í upplifun og viðhorf starfsfólks, sem gerir okkur kleift að forgangsraða verkefnum á markvissan hátt. Stjórnendur fá niðurstöður fyrir sína hópa, setja sér skýr markmið í framhaldinu og mannauðssvið fylgir þeim eftir með reglubundnum hætti til að tryggja framfarir.
5. Verður vart við aukið traust og virðingu meðal starfsólks í kjölfar vottunar GPTW?
Við verðum fyrst og fremst vör við aukið stolt meðal starfsfólks. Áhugi á niðurstöðum og frammistöðu fyrirtækisins hefur aukist, sem endurspeglar sterkari tengingu starfsfólks við vinnustaðinn og aukna þátttöku.
6. - EXTRA - Auka kannanir og vottun GPTW vitund fólks og skilning á strúktúrnum á vinnustaðnum?
Kannanirnar stuðla að aukinni vitund og skilningi á skipulagi og starfsemi fyrirtækisins. Með kynningu á niðurstöðum og eftirfylgni með umbótaverkefnum eykst gagnsæi og starfsfólk fær betri innsýn í uppbyggingu og áherslur.
7. - EXTRA - Opnar GPTW á umræðu um t.d. jafnvægi vinnu og einkalífs, kynjahlutfall, launamál o.fl.?
GPTW skapar mikilvægan vettvang fyrir opna og uppbyggilega umræðu um lykilþætti starfsumhverfisins, svo sem jafnvægi milli vinnu og einkalífs, jafnrétti og kjör. Starfsfólk hefur þar tækifæri til að koma sjónarmiðum sínum á framfæri og leggja sitt af mörkum til áframhaldandi umbóta. Í okkar niðurstöðum hefur jafnframt komið fram mikið hrós til stjórnenda, sem er afar jákvætt og hvetjandi.
